Shiv lingasatakam

ब्रह्ममुरारिसुरार्चितलिंगम् , निर्मलभासितशोभितलिंगम्। जन्मजदु:खविनाशकलिंगम्, तत्प्रणमामि सदाशिवलिंगम्।।1।। देवमुनिप्रवरार्चितलिंगम् , कामदहं करुणाकरलिंगम्। रावणदर्पविनाशनलिंगम्, तत्प्रणमामि सदाशिवलिंगम्।।2।। सर्वसुगन्धिसुलेपितलिंगम् , बुद्धिविवर्द्धनकारणलिंगम् । सिद्धसुरासुरवन्दितलिंगम्, तत्प्रणमामि सदाशिवलिंगम्।।3।। कनकमहामणिभूषितलिंगम्, फणिपतिवेष्टितशोभितलिंगम्। दक्षसुयज्ञविनाशनलिंगम्, तत्प्रणमामि सदाशिवलिंगम्।।4।। कुंकुमचन्दनलेपितलिंगम् , पंकजहारसुशोभितलिंगम्। संचितपापविनाशनलिंगम्, तत्प्रणमामि सदाशिवलिंगम्।।5।। देवगणार्चितसेवितलिंगम्, भावैर्भक्तिभिरेव च लिंगम्। दिनकरकोटिप्रभाकरलिंगम्, तत्प्रणमामि सदाशिवलिंगम्।।6।। अष्टदलोपरिवेष्टितलिंगम् , सर्वसमुद्भवकारणलिंगम्। अष्टदरिद्रविनाशितलिंगम्, तत्प्रणमामि सदाशिवलिंगम्।।7।। सुरगुरुसुरवरपूजितलिंगम् , सुरवनपुष्पसदार्चितलिंगम्। परात्परं परमात्मकलिंगम् , तत्प्रणमामि सदाशिवलिंगम्।।8।। लिंगाष्टकमिदं पुण्यं यः पठेच्छिवसन्निधौ। शिवलोकमवाप्नोति शिवेन सह मोदते॥ 9॥